La puisia di Sassari è un varori mannu #finsubito richiedi mutuo fino 100%

Chi Sassari sia isthadda – e sia – un loggu bonu pa’ la puisia, nisciunu chi no sia ceggu e sordu lu po nigà.

Già da la sigunda middai di lu 1700 v’era ca ischribìa puisii – pa’ esempiu, góbburi – . É prubaddu da lu canóniggu Giuanni Ippanu di Piubagga, chi i’ lu 1873 fazia iscì “Canti popolari in dialetto sassarese”. È un librareddu assai priziosu, acchì à auniddu un beddu poggu di puisii di lu 1700 e di la primma middai di lu 1800. Dabboi, i’ lu 1900, ischuminzendi da Pumpeu Calvia, Sassari à visthu fiurendi una produzioni puetigga di libellu assai althu: saristha basthanti fà l’innommi di Saivadori Ruju, Rosilde Bertolotti, Cesarinu Mastino, Mariu Aroca (Brottu Sarippa), Barori D. Sassu, Battistha Ardau Cannas, Gildo Motroni, Ninu Fois, Dino Siddi, Franzischu Manconi, Giommaria Cherchi, Aldo Salis, Cinzia Cossu e tanti althri, chi ani purthaddu la puisia sassaresa assai in althu, dèndiri una forthi digniddai letteraria, finz’a oggi cun althri pueti di varori cument’e Piergiuseppi Branca, Antoneddu Bazzu, Giuseppi Masia, Eugeniu Cossu pa’ zitanni uniguanti.

È impurthanti ammintassi chi chisthi pueti e chista puisia no vibiani in aria, la genti a Sassari cunniscia e liggià l’óbbari chi isciani in foima di libru o i’ “La noba Sardhigna” cu’ la so’ pagina dedicadda o chi girabani pa’ la ziddai in fogli di pabbiru. V’era propiu un’attinzioni e un aggradissimentu forthi pa’ chisthi pueti e l’óbbari d’eddi, la genti si ricunniscia in chissi versi, chi vinìani da passsoni chi la ziddai la vibìani dugna dì cument’e tutti li sassaresi. No erani passoni chi viaggiabani in althu che aeroprani, no, erani sassaresi in tuttu, cu’ li pedi beddi ficchiddi i’ li carreri e i’ li campagni di la ziddai, puru si calchunu d’eddi non era in Sassari pa’ lu trabagliu chi fazia (Mastino, Aroca): basta liggì li puisiii pa’ cumprindì lu fattu chi la luntananzia no l’à mai impididdu d’intindì lu cori e l’umori di la ziddai e di raccuntalli cu’ la puisia, e chi puisia! V’era tandu una liaddura sinzera e forthi di la genti cu’ la puisia: si ni fabiddaba in carrera, in piazza, i’ lu gionnari matessi no mancabani li battuddi serii o no sobra a l’arghumentu puisia e pueti, si cantàbani li góbburi in giru pa’ li carreri. E ca no ridiscìa a cumparà li libri, si tagliaba li puisii da La Noba Sardhigna pa’ arribbassiri e liggissiri un’althra voltha!

Dunca no si po nigà chi la linga sassaresa sia criscidda e si sia fatta manna propiu pa’ l’óbbara di chisthi cunzittadini nosthri, appassiunaddi – ma puru crìtigghi, si era lu casu – di la ziddai e di lu chi suzzidìa, intaressaddi a la biddezia, a la genti di cassisia libellu suzziari, a li fatti chi suzzidiani, a la puritigga, a li festhi…Ma puru a la chisthioni di cumenti si dubia ischribì lu sassaresu, pa’ punì rimediu a lu fattu chi dugnunu fazìa cumenti li piazìa e più di calchunu dumandaba di zirchà una suruzioni. La fozza di chissa puisia no era – e no è – soru i’ li parauri, impriaddi i’ la manera giustha e assintaddi cumenti si tocca; la puisia, da sempri, dazi emozioni, sintimenti, fazi pinsà, cummubì, ma puru ridì e dibirthì (cosa chi a li sassaresi li piazìa e li piazi assai assai…) e li pueti nosthri no ani mancaddu a chistu compitu, di siguru!

Tuttu chisthu pa’ dì, chena nosthalgia, chi abemmu a dippusizioni un patrimoniu di varori chi no vo posthu a un’ara, cosa chi calchunu voraristhia fà, trattendi chistha ricchezia cument’e roba veccia, di li tempi passaddi, chi dunca pudimmu ischarriggà fora da casa! È un ibbagliu troppu mannu: chisthu è un veru patrimoniu letterariu chi puru oggi cresci, no soru in cantiddai, cu’ l’óbbari di li pueti e ischrittori chi ancora so vibi e si dazini chi fà; in chissi puisii v’è passioni, v’è amori, v’è arthi, v’è la linga sassaresa piena di parauri e modi di dì oramai guasi immintiggaddi, sinnò pessi! E tandu, pagosa chistha gana di punì a un’ara? Pa’ ciambà cun cosa? L’arrischu è chi, abbandunendi chisthi mudelli, si póssia intrà i’ la cunfusioni, i’ l’imprubisazioni, chi no aggiùddani a turrà a lu sassaresu (e a li sassaresi…) lu loggu chi l’appartheni, dendi cussì una manu a la traschuraddezia e a la superficiariddai chi règnani chena disthuibbu, dipiazi a dillu.

Chisthu no vo dì chi da dumani tutti zi punimmu a ischribì puisii o conti, no! Vo dì chi si debi recuperà l’attinzioni, la gana d’imparà seriamenti, sia pa’ lu chi riguardha la linga sassaresa, sia pa’ turrà a cumpurthamenti e impruntaddi più serii: chena rinunzià a l’ipiritu cionfraioru chi z’appartheni, si po recuperà un poggu di serieddai no soru fabiddendi (o cantendi o recitendi in triatu…), ma puru in tanti occasioni di la vidda di dugna dì. La vidimmu tutti la situazioni di crisi chi Sassari è vibendi in chisth’anni: una ziddai chi pari abé pessu l’entusiaimu, la gana di cultura a libelli althi, lu disizu di punissi in gioggu pa’ fa calche cosa di nobu, di dibessu, d’impurthanti no soru pa’ edda matessi ma puru pa’ lu territoriu chi l’inghirieggia. Manca la fammi pa’ impresi di presgiu, ma seivi aunì li fozzi di l’Amministhazioni prubbigga e di tutti li passoni di bona vuruntai chi ani a cori la ziddai e la vidda d’edda.